كلمات وألحان:
الأخوين الرحباني

- سَعِيدِةْ

- يِسعِد مَسَاكُنْ

- سعيدِة ومِيِّةْ سعيدِة

- يا أَلِف يسعد مَسَاكُنْ


كان بِفَيِّ الرمَّانة .. في بنتْ محتارة
وتضَّل متل التعبانة .. ولا تبوحْ بسرَارا
قال تعبانة تعبانة .. ولا تبوحْ بسرَارا
قال بِـ فَيِّ الرمَّانة .. في بنت محتارة

وكان في بِلبُل عاشقها .. يحكيلا حكايِة
بزهور يِبقَى يرَاشِقها .. وتقِلُّوا جايي
قال بزهور يرَاشِقها .. وتقلُّوا جايي
قال عاشقها عاشقها .. ويحكيلا حكايِة

وتِنطُر بالحارةْ .. بالحارة
وتِعقُد زِنَّارا .. زِنَّارا
وما تِعرِف شو في عَ بَالا
عَ بَالا إسوارةْ

بَكِّير حِبَّيْنَا
بكِينَا وغِنَّيْنَا
قُول دَخلَك قُول
يا ضَوّ عَيْنَيْنَا

يا حلو يا جارْنا
يا ساكِنْ بِدَارْنا
دارْنا دار القمرْ
شو بيحلى فيها السهرْ
يا جارْنا يا ساكِن بِدارْنا
يا حلو يا جارْنا

ضِحكوا البْنَيَّات للمَوَاعيدْ
وامْتَلوا الفَيَّات بالعَنَاقيدْ
هالحكي لَـ إلنا .. والزَّعَل زَعَلْنا
والسّرَارْ سرارْنا .. يا جارْنا

وَصَّلُوا النحلاتْ للنَوَاطيرْ
قِصِّة الحِلوَات والمَشَاويرْ
بتقول الصبيِّة .. للقمر لَيْلِيِّة
مِشوارَك مشوارْنا.. يا جارْنا

بِعدِتْ السَّهْريِّة
وحِليِتْ الغنِّيِّة
لاقُونا.. لاقُونا
عَالقَمْرِيِّة
لاقُونا .. لاقُونا
مَشُّوا والْحَقونا
بهالليل ازرعُونا
شي غِنيِّة
والدِّنِي عِشقانِة
والنِجمة سِهرانِة
والهَوَى عم يضحك
ع التعبانِة
نجمِة وقمر طَلُّوا
بهالربيع يغلُّوا
يِشكِيلَا وتقِلُّو
لا تنساني

وعَمْ يِحلَى مِشوَارْنا
ونِحكي نِحكي سرَارْنا
يا حُبّ نْطَرْنَا كتير
يا مِشوار المشاوير
حكايِتنا حكايِة
والدِّنِي مضُوَّايِة
والعمر ساعةْ
والزعل إشاعةْ
والنجوم بعيدةْ
والرفقة سعيدِةْ
سعيدِة .. سعيدِة
يا حكايات جديدِة
والسَفرَة طويلِة
والقصَّة طويلِة
حِطِّي شريطَة زرقا
بِشَعرِك تِشْكيلِة
والحبّ البِدايِة
والحبّ النِهايِة
وبيِخلَصوا السهريَّات
وما بتخلص الحكايِة
والنجوم بعيدِةْ
والرِّفقَة سعيدِةْ
سعيدةْ .. سعيدةْ
يا حكايات جديدةْ

كلمات أغاني فيروز - فيروزيّات

2006 - 2022

صُنِع بالـ♥